ਅੱਜ ਦਾ ਪੰਜਾਬ

  (1)

ਭੀੜ ਭੜੱਕਾ
ਲਾਹ ਚੇਨੀ ਦੌੜਨ
ਮੇਰਾ ਪੰਜਾਬ ।
    
 (2)

ਵਰਦੀ ਵਾਲੇ
ਭੇਸ ਵਟਾਕੇ ਖ੍ਹੋਣ
ਡਰ ਨਾ ਕੋਈ ।

 (3)

ਨਸ਼ਿਆਂ ਮਾਰੀ
ਸੂਲੀ ਚੜ੍ਹੀ ਜਵਾਨੀ
ਮਾਪੇ ਬੇਬੱਸ ।

(4)

ਪੈਲੀ ਗਹਿਣੇ
ਪੜ੍ਹਾਈ ਤੋਂ ਸੱਖਣੇ
ਜੂਨ ਗਵਾਈ ।
  
(5)

ਸੁੱਤਾ ਲੀਡਰ
ਗੋਗੜ ਹੱਥ ਫੇਰੇ
ਲੋਕਾਂ ਦੇ ਜੇਰੇ ।

ਜੋਗਿੰਦਰ ਸਿੰਘ ਥਿੰਦ
    ਅੰਮ੍ਰਿਤਸਰ--(ਸਿਡਨੀ)

ਧੋਤੇ ਸਿਰਨਾਵੇ

ਅੱਥਰੂ ਧੋਤੇ                          
ਸਿਰਨਾਵੇਂ ਪਹੁੰਚੇ
ਲੈ ਲੈ ਕੇ ਹੌਕੇ ।

ਜੋਗਿੰਦਰ ਸਿੰਘ ਥਿੰਦ
ਅੰਮ੍ਰਿਤਸਰ

"ਕਦੋਂ ਤੱਕ ਯਾਦਾਂ 'ਚ ਰੱਖਾਂ"

                                                                                                                                                               R
ਕਦੋਂ ਤੱਕ ਤੈਨੂੰ ਮੈਂ ਯਾਦਾਂ 'ਚ ਰੱਖਾਂ,
ਕਦੋਂ ਤੱਕ ਤੈਨੂੰ ਮੈਂ ਖਾਬਾਂ 'ਚ ਰੱਖਾਂ ।
ਪੱਤੀ ਪੱਤੀ ਹੋ ਬਿਖਰਨਗੇ ਸਾਰੇ,
ਕਦੋਂ ਤੱਕ ਮਹਿਕਾਂ ਗੁਲਾਬਾਂ 'ਚ ਰੱਖਾਂ।
ਕਈਆਂ ਆਕਾਸ਼ਾਂ 'ਚ ਦੌੜਣ ਸੋਚਾਂ
ਜਦੋਂ ਪੈਰ ,ਬੱਸ ਰਕਾਬਾਂ 'ਚ ਰੱਖਾਂ।
ਬਹਿਕਾਂ 'ਚ ਦੰਦ-ਕੱਥਾ ਬਣ ਗਈ,
ਕਦੋਂ ਤੱਕ ਮਹੱਬਤਾਂ ਰਾਜ਼ਾਂ 'ਚ ਰੱਖਾਂ।
ਯਾਦਾਂ ਦੇ ਦੀਵੇ ਬੇ-ਹਿਸਾਬ ਬਾਲੇ,
ਕਦੋਂ ਤੱਕ ਯਾਦਾਂ ਹਿਸਾਬਾਂ 'ਚ ਰੱਖਾਂ।
ਹਣ ਇਹਸਾਸੇ-ਦਰਦ ਵੀ ਨਾ ਰਿਹਾ,
 ਦਇਆਵਾਨਾਂ ਜਾਂ ਜਲਾਦਾਂ 'ਚ ਰਖਾਂ।
ਇਹ ਕਲਬੂਤ ਹੁਣ ਹੋਰ ਕੀ ਵਿਗੜੂ
ਵੀਰਾਨੇ 'ਚ ਰੱਖਾਂ ਕਿ ਬਾਗਾਂ 'ਚ ਰਖਾਂ।
ਕਦੋਂ, ਕਿਨੇ ਤੇ ਕਿਓਂ ਸਿਤਮ ਹੋਏ,
ਮਰਹੱਲੇ ਸਾਰੇ ਕਿਵੇ ਹਿਸਾਬਾੰ 'ਚ ਰਖਾਂ।
ਦੁਸ਼ਮਨ ਤਾਂ ਹਮੇਸ਼ਾਂ ਅਣਹੋਣੀ ਕਰਦਾ,
'ਥਿੰਦ' ਤਾਂਓਂ ਦੱਮ ਉਹਦਾ ਨਾਸਾਂ 'ਚ ਰੱਖਾਂ।

 ਜੋਗਿੰਦਰ ਸਿੰਘ  ਥਿੰਦ
 (ਅੰਮ੍ਰਿਤਸਰ-ਤੇ ਸਿੱਡਨੀ)







 

ਮਾਂ ਦਿਵਸ

 1.

ਮਾਂਵਾਂ ਦਾ ਦਿਨ 

ਮਾਂ ਸੁਰਗਾਂ ਚੋਂ ਆਵੇ

ਲਾਡ ਲਡਾਵੇ।

2.

ਮਾਂ ਬੇਸਬਰੀ

ਲਾਲਟੈਨ ਲੈ 'ਕੱਲੀ

ਲੱਭਣ ਚੱਲੀ।

3.

ਮਾਂ ਨੂੰ ਚੁੱਭਿਆ 

ਪੈਰੀਂ ਜੇ ਕੰਡਾ ਲੱਗਾ

ਸੂਈ ਲੈ ਕੱਢੇ।

4.

ਮਾਂ ਦੀ ਗੋਦੀ

ਨਿੱਘ ਅਨੋਖਾ ਆਵੇ

ਚੋਗੇ ਖਿਲਾਵੇ।

5.

ਮਾਂ ਵਰਗੀ ਛਾਂ

ਕਿਤੇ ਦੁਨੀਆਂ 'ਚ ਨਾ

ਠੰਡਾਂ ਪਾਉਂਦੀ।

ਜੋਗਿੰਦਰ ਸਿੰਘ   "ਥਿੰਦ"
      (ਅੰਤ੍ਰਿਸਰ)

ਕੁਲੀ

ਬੈਠੇ ਨੇ ਕੁਲੀ

ਗੱਡੀ ਨੂੰ ਉ਼ਡੀਕਣ
ਉੱਠ ਭੱਜਣ
ਮੁੜਕੇ ਨੂੰ ਪੂੰਝਣ           
ਮਾੜੇ ਲਿਤਾੜੇ
ਹੁੰਦੇ ਨੇ ਸਾਹੋ ਸਾਹੀ
ਫੇਰੇ ਤੇ ਫੇਰਾ
ਖੂਨ ਪਸੀਨਾ ਇੱਕ
ਝੱਗੜੇ ਵਾਧੂ
ਅੱਜ ਕਮਾ ਲਿਆਵੇ 
ਉਡੀਕੇ ਤੀਂਵੀਂ
ਤਾਂਹੀ ਅੱਗਲੀ ਪੱਕੂ
ਥੱਕਿਆ ਹਾਰਾ
ਰੁੱਖੀ-ਮਿੱਸੀ ਹੀ ਖਾਵੇ
ਭੁੰਜੇ ਝੱਟ ਸੌਂ ਜਾਵੇ ।

ਜੋਗਿੰਦਰ ਸਿੰਘ  ਥਿੰਦ
   (ਅੰਮ੍ਰਿਤਸਰ)

ਮਜ਼ਦੂਰ ਦਿਵਸ

(1)
ਜ਼ਖਮੀ ਹੱਥ
ਕੁੱਟਣ ਰੋੜੇ ਰੋੜੀ
ਤਿੱਖੜ ਧੁੱਪੇ ।

(2)
ਸਭ ਕੀੜੀਆਂ
ਕਰਨ ਮਜ਼ਦੂਰੀ
ਦਿਨ ਤੇ ਰਾਤ।

ਜੋਗਿੰਦਰ ਸਿੰਘ ਥਿੰਦ
(ਅੰਮ੍ਰਿਤਸਰ)