ਗਜ਼ਲ
ਜਾਂਦਾ ਜਾਂਦਾ ਰਾਹੀ ਕੋਈ ਤਾਂ ਗੱਲ ਪਤੇ ਦੀ ਕਹਿ ਜਾਂਦਾ  
ਦਿਲਬਰ ਵਿਰਲਾ ਮਿਲਦਾ ਐਸਾ ਕੱਡ ਕਲੇਜਾ ਲੈ ਜਾਂਦਾ

ਮਿਠੀ ਮਿਠੀ ਪੀੜ ਪਰਾਈ ਸਾਥੋਂ ਛੱਡਿਆਂ ਛੱਡ ਨਾਂ ਹੋਵੇ
ਹਰ ਰੁਤੇ ਜੋਬਨ ਚੜਦਾ ਪਰ ਅੱਖਾਂ ਰਾਹੀਂ ਵਹਿ ਜਾਂਦਾ

ਲੈ ਅੱਜ ਤੋਂ ਅਸਾਂ ਤੈਨੂੰ ਉਕਾ ਭੁਲ ਜਾਣ ਦੀ ਸੌਂਹਿ ਖਾਦੀ
ਵਿਰਲਾ ਹੁੰਦਾ ਸਾਡੇ ਵਰਗਾ ਸੱਟ ਇਸ਼ਕ ਦੀ ਸਹਿ ਜਾਦਾ

 ਬੇਗਰਜ਼ ਸਾਂਝ ਬਣਾਈ ਅਸਾਂ ਉਹ ਵੀ ਤੋੜ ਨਿਭਾਈ ਨਾ
ਨਿਮੋਸ਼ੀ ਹੁੰਦੀ ਸਾਡੀ ਕਿਨੀ ਜੇ ਕੰਮ ਤੇਰੇ ਨਾਲ ਪੈ ਜਾਂਦਾ

ਕਿਸ ਭੁਲੇਖੇ ਬੈਠੇ ਰਹੀਏ ਆਸਾਂ ਟੁਟੀਆਂ ਰੀਝਾਂ ਮੁਕੀਆਂ
ਇਸ ਜਵਾਨੀ ਪਿਛੋਂ 'ਥਿਦ 'ਦੱਸ ਬਾਕੀ ਕੀ ਹੈ ਰਹਿ ਜਾਂਦਾ

ਇੰਜ: ਜੋਗਿੰਦਰ ਸਿੰਘ "ਥਿੰਦ"
                  (ਸਿਡਨੀ)