ਗੀਤ
  ਆ ਨੀ ਕੁੜੀਏ ਸ਼ਹਿਰ ਦੀਏ
ਤੇੈਨੂੰ ਪਿੰਡ ਦੀ ਕੁੜੀ ਵਿਖਾਵਾਂ
ਉਕਾ ਨਾਂ ਉਹ ਥੱਕਦੀ
ਕੰਮ ਕਰਦੀ ਨਾਲ ਭਰਾਵਾਂ ਸਾਂਵਾਂ

ਦੋ ਕੁ ਕਤਾਬਾਂ ਚੁਕ ਕੇ
ਤੇਰੀਆਂ ਥੱਕ ਜਾਂਦੀਆਂ ਨੇ ਬਾਹਾਂ
                            ਆ ਨੀ ਕੁੜੀਏ ਸ਼ਹਿਰ ਦੀਏ
                           ਤੈਨੂੰ ਪਿਂਡ ਦੀ ਕੁੜੀ ਵਿਖਾਵਾਂ 
ਗਨੇ ਚੂਪੇ ਰੋਜ਼ ਹੀ ਉਹ 
ਰੱਜ ਰੱਜ ਬੜੇ ਸਵਾਦਾਂ ਨਾਲ
ਮੱਖਣ ਪੇੜੇ ਖਾ ਖਾ ਰੰਗ ਕੀਤਾ ਏ ਲਾਲ਼
ਦੰਦ ਤੇਰੇ ਮਲੈਮ ਜਹੇ ਬੁਰਾ ਹੋ ਜੂ ਹਾਲ
ਇਹ ਕਿਹੜੀ ਕੁੜੀ ਮਲੈਮ ਜਹੀ
ਬਿਟ ਬਿਟ ਤੱਕਣ ਮੱਝਾਂ ਗਾਵਾਂ
                       ਆ ਨੀ ਕੁੜੀਏ ਸ਼ਹਿਰ ਦੀਏ
                       ਤੈਨੂੰ ਪਿੰਡ ਦੀ ਕੁੜੀ ਵਿਖਾਵਾਂ ।

ਪਹਿਲਾਂ ਗੇੜੇ ਵੇਲਨਾਂ
ਕੱਢੇ ਚਿਟਾ ਚਿਟਾ ਰੂੰ
ਵੱਟ ਪੂਨੀਆਂ ਸੂਤਰ ਕੱਤਦੀ
ਚਰਖਾ ਏ ਕਰਦਾ ਘੂੰ ਘੂੰ
ਰੋਟੀ ਖਾਣ ਦਾ ਵੇਲਾ ਹੋ ਗਿਆ
ਵਾਜਾਂ ਮਾਰਦੀ ਭੈਣ ਭਰਾਵਾਂ
                      ਆ ਨੀ ਕੁੜੀਏ ਸ਼ਹਿਰ ਦੀਏ
                     ਤੈਨੂੰ ਪਿੰਡ ਦੀ ਕੁੜੀ ਵਿਖਾਵਾਂ

ਹੁਣ ਪਿੰਡ ਦੀ ਕੁੜੀ ਵੀ ਘੱਟ ਨਹੀਂ
ਲੈ ਕਤਾਬਾਂ ਜਾਂਦੀ ਪਈ ਸਕੂਲ
ਅੱਵਲ ਆਵੇ ਜਮਾਤ ਚੋਂ
ਸਮਾਂ ਗਵਾਓਂਦੀ ਨਹੀ ਫਜ਼ੂਲ
ਖੁਸ਼ ਹੋ ਪਿਓ ਆਖਦਾ
ਧੀਏ ਆ ਤੈਨੂੰ ਅੱਗੇ ਤੱਕ ਪੜ੍ਹਾਵਾਂ
                       ਆ ਨੀ ਕੁੜੀਏ ਸ਼ਹਿਰ ਦੀਏ
                       ਤੈਂਨੂੰ ਪਿੰਡ ਦੀ ਕੁੜੀ ਵਿਖਾਵਾਂ
ਦੋ ਕੁ ਕਤਾਬਾਂ ਚੁਕ ਕੇ
ਤੇਰੀਆਂ ਥੱਕ ਜਾਂਦੀਆਂ ਨੇ ਬਾਹਾਂ

   ਇੰਜ: ਜੋਗਿੰਦਰ ਸਿੰਘ "ਥਿੰਦ"
                       (ਸਿਡਨੀ)