ਗਜ਼ਲ
ਤੇਰੀ ਜ਼ਾਤ ਕਿਸੇ ਨੇ ਨਹੀਂ ਪੁਛਨੀ, ਅੱਮਲਾਂ ਦੇ ਹੋਣਗੇ ਹਿਸਾਬ ਓਥੇ
ਨਹੀਂ ਚੱਲਨੀ ਕੋਈ ਦਲੀਲ ਬਾਜ਼ੀ, ਜੇ ਹੋਇਆ ਖਾਨਾ ਖਰਾਬ ਓਥੇ

ਅੱਜੇ ਵੀ ਹੈ ਤੇਰੇ ਕੋਲ ਬਹੁਤ ਵੇਲਾ, ਗੁਨਾਹਾਂ ਤੋਂ ਹੁਣ ਵੀ ਕਰ ਤੋਬਾ 
ਕਰ ਲੈ ਹੁਣ ਅਪਣਾ ਸਾਫ ਵਿਹੜਾ, ਮਿਲੂ ਤੈਨੂੰ ਖਿੜਆ ਗਲਾਬ ਓਥੇ

ਬਿਨਾ ਸੋਚਿਆਂ ਮਾਰ ਧਾੜ ਕਰਦੇ,ਅੱਜ ਮਾਣ ਜਿਨ੍ਹਾਂ ਨੂੰ ਡੌਲਿਆਂ ਤੇ
 ਦਰਗਾਹੇ ਜਾਕੇ ਅੱਗੇ ਪਤਾ ਲੱਗੂ, ਜਦੋਂ ਕਟ ਕਟ ਬਣੂੰ ਕਬਾਬ ਓਥੇ

ਪੈਰ ਅੱਜ ਜਮੀਨ ਤੇ ਨਹੀਂ ਟਿਕਦੇ, ਨਾਂ ਕਿਸੇ ਨੂੰ ਉਹ ਪਹਿਚਾਣਦੇ ਨੇ
ਭਾਂਡਾ ਫਰੇਬ ਦਾ ਆਖਰ ਭਜਨਾਂ ਏ ,ਨਹੀਂ ਰਹਿਣੇ ਝੂਠੇ ਨਿਕਾਬ ਓਥੇ

ਜਿਨਾਂ ਦੇ ਥੱਲੇ ਬੈਠਕੇ ਅੱਜ ਤੱਕ, ਹਮੇਸ਼ਾਂ ਠੰਡੀਆਂ ਛਾਂਵਾਂ ਮਾਂਣੀਆਂ ਨੇ
ਇਹਦੇ ਬਦਲੇ ਕੀ ਏ ਮੋੜਿਆ ਤੂੰ, ਉਹ ਹੀ ਪੁਛਣਗੇ ਤੈਥੋਂ ਹਿਸਾਬ ਓਥੇ

"ਥਿੰਦ" ਪੰਡ ਅਪਣੀ ਤੂੰ ਰੱਖ ਹੌਲੀ, ਆਰਾਮ ਨਾਲ ਪੈੰਡਾ ਕੱਟ ਜਾਸੀ
ਕਹਿੰਦੇ ਉਹ ਸਿਧੇ ਸਵਰਗ ਜਾਂਦੇ, ਜਹਿੜੇ ਪਹੁੰਚਦੇ ਨੇ ਬੇਦਾਗ ਓਥੇ
            
                          ਇੰਜ: ਜੋਗਿੰਦਰ ਸਿੰਘ "ਥਿੰਦ"
                                           ( ਸਿਡਨੀ )